Një “pasardhës” i Fishtës në pozicionin e lartë parlamentar

Nga Kumtari

Në mbledhjen e fundit të Këshillit Kombëtar, Lulzim Basha vendosi që Agron Gjekmarkajn ta emëronte nënkryetar Kuvendi, pas largimit të Enkelejd Alibeajt nga ky post, i cili zëvendësoi Alfred Rushajn në drejtimin e grupit parlamentar.

Jo pak njerëz po shohin me habi ngjitjen e shpejtë në shkallët e karrierës politike të Agron Gjekmarkajt.

Për ata që e njohin nga afër atë, kjo nuk është ndonjë çudi e madhe.

Agron Gjekmarkaj shquhet për dëshirën e zjarrtë të protagonizmit dhe si një karrierist i papërmbajtshëm.

Fakti që Partia Demokratike ndodhet në zgripin më të madh historik që prej themelimit të saj, bën të mundur që të krijohen hapësira të përkohëshme për njerëz me ambicie.

Gjekmarkaj e shfrytëzoi këtë zgrip të PD duke u pozicionuar PRO Bashës dhe duke i bërë atij avokatinë në çdo studio televizive.

Duke patur thuajse zero konkurencë, ai arriti të ngjitet deri në postin e nënkryetarit të Parlamentit të Shqipërisë.

Ajo që mbetet për t’u parë tani e në vazhdim është si do sillet Gjekmarkaj në postin e ri.

Pasi ai shquhet edhe për një tjetër veti, atë të pozicionimit të vetes si intelektual i shquar dhe pasardhës i Fishtës.

Por, kjo veti e tij bie ndesh me atë të Kryeministrit Rama, i cili nga ana e tij nuk i hap rrugë kujt për protagonizma të tilla, dhe mund të vijë një ditë, jo larg, që t’ia kërkojë Bashës largimin e Gjekmarkajt nga pozicioni bezdisës prapa shpinës së kryeministrit në parlament. Kujtojmë që shpesh herë Rama e ka ironizuar Gjekmarkajn duke e thirrë “Padre”.©kumtari.al