Udhëheqësi i fortë i Bjellorusisë, Alexander Lukashenko, u tha emigrantëve në kufirin me Poloninë, ditën e sotme, se ai nuk do të përpiqet t’i ndalojë ata të arrijnë në Bashkimin Evropian, duke i kërkuar Gjermanisë që t’i pranojë ata. Në pamjet e publikuara nga media shtetërore, Lukashenko u shfaq duke vizituar një qendër pranë kufirit polak që pret qindra emigrantë – kryesisht kurdë nga Iraku – të cilët udhëtuan drejt Bjellorusisë me shpresën për të arritur në Evropë, raporton Moscow Times.
Qeveritë perëndimore akuzojnë Lukashenkon për tërheqjen e emigrantëve në vendin e tij, për të ndezur një krizë kufitare me BE-në si hakmarrje për sanksionet, të cilat ai i mohon. Lukashenko u shfaq duke ecur mes emigrantëve dhe duke folur me emigrantët në qendër, më pas duke iu drejtuar atyre jashtë nga një podium në një fjalim të stilit të fushatës. Të veshur me pallto dimërore teksa qëndronin në të ftohtë, emigrantët u shfaqën të hutuar, megjithëse pati duartrokitje të rralla.
Lukashenko, i cili ka akuzuar BE-në për dështimi në përmbushjen e standardeve humanitare, duke refuzuar hyrjen e emigrantëve, u tha atyre se qeveria e tij nuk do të bënte asgjë për t’i penguar ata të shkojnë në Evropë.
“Nëse dikush dëshiron të shkojë në Perëndim – kjo është e drejta e tij. Ne nuk do të përpiqemi t’ju kapim, t’ju rrahim dhe t’ju mbajmë pas telave me gjemba,” tha Lukashenko. “Ne do të punojmë me ju për të arritur ëndrrën tuaj.”
Me shumë prej emigrantëve që shpresojnë të arrijnë në Gjermani, Lukashenko tha se po i kërkonte popullit gjerman t’i mirëpresë ata.
“Ju lutemi, merrni këta njerëz. Ky numër nuk është shumë i madh. Ata duan të jetojnë në Gjermani – 2000 njerëz nuk janë një problem i madh për Gjermaninë,” tha ai.
Në muajt e fundit mijëra emigrantë nga Lindja e Mesme kanë udhëtuar drejt Bjellorusisë me shpresën për të kaluar kufirin në Poloninë anëtare të BE-së.
©Kumtari.al
