Pas mbledhjes së ditës së sotme, Komiteti Teknik i Ekspertëve vendosi që personat mbi 60 vjeç mund të kryejnë dozën e tretë të vaksinës nëse ka kaluar 6 muaj nga doza e dytë.
Gjithashtu u vendos që mund të vaksinohen dhe fëmijët duke filluar nga 16-vjeç, si dhe fëmijët e grupmoshës 12-15 vjeç që kanë sëmundje që kanë tendencë t’iu ulin imunitetin.
“Komiteti Teknik i Ekspertëve ka vendosur sot pas shqyrtimit të vendimeve të komitetit të ekspertëve të vaksinimit që:
1. Personat që janë mbi 60 vjec të bëjnë dozën e tretë të vaksinës jo më herët se sa 6 muaj pasi kanë bërë dozën e dytë, sipas udhëzimëve që jep ISHP, duke nisur nga 1 nëntori.
2. Fëmijët që janë mbi 16 vjec do ftohen për t’u vaksinuar gjithmonë me rekomandimin e mjekut, miratimin e prindit duke nisur nga 1 nëntori.
3. Do ftojmë për vaksinim dhe fëmijët 12-15 vjec që paraqesin sëmundje që kanë të bëjnë me ulje të imunitetit”, tha zv ministrja e Shëndetësisë Mira Rakacolli.
Ajo tha se në këtë situatë pandemie, prioritet do të mbetet mbulimi i popullatës me dozën e parë dhe të dytë të vaksinës për ata që nuk e kanë bërë ende.
Ndërkohë Komiteti i Ekspertëve ka vendosur që të mos ndryshojë masat kufizuese që janë aktualisht në fuqi.
“Duke u bazuar në analizat e situatës komiteti i ekspertëve me gjithë këtë përkeqësim të lehtë të shifrave niveli i masave shtrenguese do të mbetet i njëjtë.
Ky nivel masash i përgjigjet tërësisht këtyre indikatorëve, ajo që tërheq vëmendjen është zbatimi me rigorozitet i tyre. Nëse zbatohen me rigorozitet s’ka vend për shtrëngime të mëtejshme”.
