Deputeti i Partisë Demokratike, Luçiano Boçi, u shpreh se kryeministri Edi Rama e ka vendosur tashmë se kë do të zgjedhë për President të Republikës.
Në një intervistë për A2CNN, Boçi pati kritika për Enkelejd Alibeajn, ku theksoi se ai po bëhet palë me Ramën në këtë proces.
“Nga një anë e cilëson grabitës dhe hajdut dhe ulet të caktojë Presidentin me një grabitës dhe hajdut. Alibeaj duhet të sillet sipas pozicionin që i kanë dhënë demokratët, jo sipas pozicionit që i jep Rama. Ne nuk do të pyesim zotin Rama apo zotin Balla se kë kemi kryetar grupi parlamentar”, tha Boçi.
Sipas deputetit demokrat, Rama po tallet me të gjithë sepse e ka të qartë emrin që do të vendosë në krye të Presidencës.
Megjithatë, Boçi tha se në seancën e 16 majit, opozita nuk do të mungojë.
“Koha e bojkoteve dhe pazareve ka marrë fund. Do të jemi në sallë, do të shprehim qëndrimin tonë. Por nuk mund të jetë pranues, sepse nga ky proces do të dalë një president “alla” Rama, që do t’i bindet”, shtoi Boçi.