Më keq nuk ka ku të shkojë. Liria e medias në Shqipëri ka pësuar rënie të madhe ku gazetarët janë të shantazhuar, të kontrolluar në pjesën më të madhe nga qeveria dhe të dhunuar nga policia. Ky është konkluzioni i organizatës ndërkombëtare “Gazetarët pa Kufij”. Ata e rendisin Shqipërinë në vendin e 103, duke shënuar një rënie prej 20 vendesh krahasuan me vitin paraprak kur renditej ne vendin e 83-të.
Në analizë janë marrë 180 vende të botës dhe Shqipëria ka thyer një tjetër rekord negativ, pasi në rajonin e Ballkanit Perëndimor shënohet si vendi me lirinë më të kufizuar të medias, duke lënë pas Serbinë, Kosovën, Bosnjen, Malin e Zi dhe Maqedoninë e Veriut.
Rama reagoi i çuditur, por në fakt edhe mënyra e reagimit ishte sulm mbi median. Ai aludonte se policia nuk ka dhunuar median dhe ishin qesharake përfundimet e raportit, por harroi rastet kur në protestën për vrasjen e Klodian Rashës nga policia e shtetit, struktura të veçanta të policisë dhunuan gazetarët, duke i shoqëruar edhe në komisariate, pavarësisht se kishin dokumentet identifikues si punonjës të medias.
Vetë Rama është dhunuesi kryesor, kur dukshëm përbuz gazetarët dhe i “dënon me riedukim”, gjithashtu në konferenca për shtyp parapërgatiten pyetjet sipas zëdhënësit të qeverisë dhe përzgjidhen gazetarët e pushtetit për të bërë pyetjet që kërkon kryeministri.
Të ndodhur para këtij fakti, qeveria tashmë e ka të qartë dhe po e mendon seriozisht se përderisa ka “blerë” e shantazhuar pjesën më të madhe të medias përse të mos kontrollojë edhe organizatën ndërkombëtare “Gazetarët pa Kufij”.
“Ore e kujt është kjo media”?-po pyesin Fug-sat e Ramës. Si mund tua gjejnë anët, a kanë aplikuar për ndonjë leje ndërtimi pronarët e saj? Nëse jo, a kanë ndonjë pronë diku që t’i shpallin “investitorë strategjik”, duke u dhënë leje për ndërtimin e komplekseve turistik. Nëse nuk nxenë mend me joshje, ka edhe forma të tjera duke u vendosur gjoba, duke u çuar lloj e soj inspektoriatesh për tu mbyllur biznesin. Nëse edhe në këtë formë nuk tërhiqen, atëherë të provojnë variantin tjetër nëpërmjet gjyqtarëve që mbajnë veladonin e Rilindjes.
Një formë është që biznesmenë prënë pushtetit të denocojnë mediat duke i paditur në gjykatë dhe më pas dënohen me gjoba të majme, ku qëllimi mbetet shantazhimi edhe nëpërmjet sistemit të drejtësisë të kontrolluar nga pushteti politik.
Paçka se po mendohen gjatë për të gjetur një mënyrë që të ndërhyjnë e kanë të vështirë, pasi organizata “Gazetarët pa Kufij” nuk ka aktivitet në Shqipëri dhe as konçesionet, as shantazhi dhe as joshja nuk bëjnë punë. Ka heshtje nga diplomacitë kryesore ndërkombëtare në Shqipëri. Në fundin e mandatit ambasadori i BE-së ka zgjedhur heshtjen. Ndërsa ambasadorja e AHBA-ve në vendin tonë u mjaftua me takimin e dy gazetarëve për të shprehur se mbështetsin lirinë e medias. Gjithsesi asnjë zë për raportin e zi të ardhur nga hulumtimi i organizatës ndërkombëtare “Gazetarët pa Kufij”.
–Marrë nga Boldnews.al
