Presidenti turk Tajip Erdogan i bëri thirrje BE-së të martën të tregojë “të njëjtën ndjeshmëri” për aplikimin e Turqisë për t’u anëtarësuar në bllok, siç tregoi për ofertën e anëtarësimit të Kievit, duke kritikuar vendet anëtare se nuk janë “të sinqertë”.
“A do ta vendosni Turqinë në axhendën tuaj kur dikush të na sulmojë (ne) gjithashtu?” tha ai, duke folur në një konferencë shtypi në Ankara.
“Turqia ka pritur që nga vitet 1960 për t’u anëtarësuar në BE dhe tani ka filluar debati për Ukrainën. Ne i konsiderojmë pozitive përpjekjet e anëtarësimit të Ukrainës. Por pse Turqia nuk është anëtare?”
Erdogan i bëri thirrje Ukrainës dhe Rusisë që të ndalojnë menjëherë luftën dhe të “kontribuojnë në paqen botërore”, duke shtuar se Ankaraja nuk ishte kundër zgjerimit të NATO-s.
Turqia, anëtare e NATO-s, ndan një kufi detar me Ukrainën dhe Rusinë dhe ka lidhje të mira me të dyja. Sipas një pakti të vitit 1936, Ankaraja tha të hënën se po mbyllte ngushticat e saj të Detit të Zi gjatë pushtimit rus të Ukrainës, duke kufizuar kalimin e disa anijeve ruse nga Mesdheu./Reuters
©kumtari.al
