Kryetari i PD-së, Sali Berisha, mori pjesë në koncertin kushtuar popullit të Ukrainës, i ftuar nga Ambasadori i këtij vendi, z. Volodimit Shkurov.
Duke publikuar fotot nga koncerti i mbajtur në Tiranë, Berisha bëri këtë vlerësim në Fb:
“Me ftesë, dhe në shoqerinë e Ambasadorit të Ukrainës në Shqipëri, Shkëlqesisë së Tij, Volodimir Shkurov, mora pjesë në koncertin e mrekullueshëm të tre tenorëve virtuozë, Mykhailo Malafii, Klodjan Kaçani, Vitaly Kovalçuk, shoqëruar nga orkestra e Teatrit të Operas dhe Baletit, dhe instrumentistë të shquar ukraines, nën drejtimin e dirigjentit të mirënjohur, Leonardo Quadrini dhe regjinë e Osman Mulës.
Morën pjesë të ftuar në koncert artistët e mirënjohur, pianisti Genc Tukiçi dhe soprano Ramona Tullumani.
Një falenderim për Ambasadorin Shkurov, artistët ukrainas dhe shqiptarë, për koncertin dinjitoz, në nderim të kombit që po lufton sot për lirinë e botës. Lavdi Ukrainës!” nënvizoi Berisha.
