CNA.al me dokumente ekskluzive dhe zyrtare ka mundur të zbërtheje skemën e plotë të koncesionit të inceneratorëve në Shqipëri, që fillon me 22 milion euro në Elbasan, 28 milionë euro në Fier, dhe 128 milionë euro në Tiranë.
Në një mënyrë të qartë, duke investiguar dokumentat, duke siguruar dhe materiale ekskluzive, kemi treguar se janë të njëjtët persona që fshihen pas tre inceneratorëve. Të cilët janë shtetasi Klodian Zoto, shtetasi Mirel Mërtiri dhe bashkëjetuesja e këtij të fundit Stela Gugallja. Këta katër persona janë njerëzit kryesorë të cilët kanë marë dy ofertat e pakërkuara për inceneratorin e Elbasanit dhe të Fierit, për të cilat qeveria shqiptare duhet të paguajë të paktën 50 milion euro.
Ndërsa në Tiranë, CNA.al ka mundur të zbulojë se kompania e cila pretendohet se është një kompani hollandeze, Integreted Energy BV, është thjeshtë dhe vetëm një kompani e krijuar nga të njëjtët persona, të përfshirë në ndërtimin e inceneratorëve në Fier dhe Elbasan.
Pra, sërish del në skenë Klodian Zoto.
Kompania pranon skandalin
Kompania kryesore e piramidës së koncesioneve për inceneratorët, Integreted Technology Services, ITS, në faqen e saj zyrtare tregon qartë atë që ka raportuar CNA.al dhe mediat e tjera. Pra, se pas konçesionit të inceneratorëve në Shqipëri, qëndron një person.
Sipas asaj që deklaron vetë kjo kompani në faqen e saj zyrtare, ITS është ajo që ka ndërtuar landfillin dhe kapsulimin e mbetjeve në Elbasan, është ajo që ka ndërtuar landfillin dhe po punon në Vlorë, dhe në Fier.
Është ajo që ka ndërtuar fazën e parë dhe të dytë, në landfillin e Tiranës.
Pra, vërtetohet ajo çfarë kanë thënë mediat, që është raportuar nga CNA.al dhe disa media të tjera, që pas inceneratorëve qëndron një person që quhet Klodian Zoto dhe në strukturën e kompanive është dhe Mirel Mërtiri.
Inceneratori i Tiranës
Edhe pse pretendohet se bëhet fjalë për një kompani holandeze, në fakt është ITS e Klodian Zotos, e cila qëndron pas.
“Integrated Technology Services” ka lidhur një kontratë nënkontraktimi me shoqërine “Integrated Energy BV SPV” shpk me datë 07.12.2017.
Projekti përfshin kryerjen e punimeve civile për kapsulimin e landfillit ekzistues si dhe të punimeve mekanike për ndërtimin e linjës së selektimit të mbetjeve si dhe të impiantit të trajtimit të mbetjeve urbane. Gjithashtu edhe menaxhimin e tyre”-thuhet në faqen zyrtare të ITS.
Vlera, për fazën e parë të punimeve është 5,204,913.48 euro.
Ndërsa për fazën e dytë vlera është 5,205,138.13 euro.
Inceneratori i Elbasanit
ITS, qartazi në faqen e saj zyrtare thotë se “Shoqëria “Integrated Technology Services” ka lidhur një kontratë nënkontraktimi me shoqërinë “Albtek Energy” shpk me datë 20/02/2015 me objekt: Kryerje të punimeve civile, gërmimi, shtresash të ndryshme, betonarmeje, sistemimi argjinature, pastrimi apo mirëmbajtjeje të dampës dhe bregut pranë lumit Shkumbin për realizimin e projektit në fjalë si dhe për menaxhimin e landfillit, selektimit të mbetjeve dhe impiantit të trajtimit të mbetjeve urbane”.
Ndërsa vlera e punimeve thuhet se është 6,496,502.00 euro.
Inceneratorit i Fierit
Në faqen e ITS thuhet se bëhet fjalë për “Një projekt në bazë të të cilit shoqëria “Integrated Technology Services” ka lidhur një kontratë nënkontraktimi me shoqërinë “Integrated Technology Waste Treatment Fier” shpk me datë 21.11.2016.”.
Në Fier, vlera e punimeve është 6,523,086.01 euro. Pra nga një koncesion me vlerë 28 milionë euro, mbi 6 milion i janë dhënë Integreted Technology Services, të Klodian Zotos.
Shkojmë më tej në landfillin e Vlorës
Në faqen zyrtare të ITS thuhet se “Kontrata është nënshkruar me “Bashkinë e Vlorës” si Autoritet Kontraktues në 27 Prill 2020.” Dhe vlera është 9,801,624.04 euro.
Një tjetër detaj që bie në sy, me një vëzhgim të thjeshtë në faqen zyrtare të ITS, është fakti se deri ditën që janë marrë koncesesionet e inceneratorëve, nuk ka asnjë punim. Pra, një kompani që lind nga hiçi dhe shkon direkt tek landfillet.
CNA.al me dokumente ekskluzive ka treguar qartazi zinxhirin e kompanive, në Elbasan, në Fier dhe në Tiranë, , ndërsa ato tashmë pranohen publikisht edhe në faqen zyrtare të ITS.
Këto janë ato që pranojnë vetë në faqen zyrtare. Por, milionat e eurove janë shumë më të mëdha për Klodian Zoton, Mirel Mërtirin dhe rrjetin që kanë përfituar konçesione qindra milionë euro, që paguhen nga taksat e shqiptareve dhe i kalojnë në kompani zinxhit.
Pra, janë para që i marrin nga shqiptarët dhe i fusin nga një xhep në një tjetër./CNA.al
