Nga Ilir Alimehmeti
“Çdo premtim politik i bërë në fushatë elektorale, duhet të paguhet ose përmes taksave më të larta, ose përmes rritjes së borxhit.” Citim i Margaret Thatcher (ish-Kryeministre e Britanisë së Madhe)
Kujdes, kjo shprehje vlen për UK, se në Shqipëri edhe rriten taksat, edhe rritet borxhi publik, por premtimi prapë nuk mbahet. E mbani mend premtimin e “Shëndetësisë falas”? Vetë Ministria e Shëndetësisë vetëdeklaron në OBSH sa para paguajnë shqiptarët nga xhepi për shpenzimet shëndetësore.
Kujdes: Siç e dimë vetëdeklarimi është gjithnjë një shifër e retushuar dhe realiteti është gjithnjë më keq. Por le t’i përmbahemi shifrave zyrtare që raporton Banka Botërore nga burimi i OBSH, ku Shqipëria ka raportuar për herë të fundit në vitin 2018.
Pagesa nga xhepi për shëndetin në vitin 2018 është:
44.6% në Shqipëri
18.1% në botë
15.5% në Bashkimin Europian
Pra, proporcioni që një shqiptar paguan nga xhepi është dyfish e gjysmë më shumë se sa mesatarja botërore (44.6%/18.1% = 2.5), gati trefish më shumë se mesatarja e Bashkimit Europian (44.6%/15.5% = 2.9). Kujdes: askush në BE apo vend tjetër nuk ka premtuar shëndetësi falas, e megjithatë atje paguhet më pak.
Brenda Shqipërisë, vlera për frymë e paguar nga xhepi për shëndetësinë ka qenë:
288.81 $ në vitin 2013, dhe
324.12 $ në vitin 2018, pra:
12.2% është rritur ky shpenzim deri në vitin 2018.
Pra, t’i lëmë premtimet false pas krahëve, sepse premtimi vlen po aq sa është integriteti i atij që e bën premtimin.
Për detaje vizitoni databazën e Bankës Botërore.
