Rama përmendet 14 herë në dosjen amerikane/ Si e ndryshoi qëndrimin e tij

Nuk duhet të ketë qenë e lehtë për Edi Ramën të lexojë dosjet e Charles McGonigal, ish-shef në FBI, që u arrestua pas pagesave të padeklaruara nga rusë dhe shqiptarë.

14 herë përmendet “kryeministri i Shqipërisë” në dosje, ku jepen detaje për udhëtimet e amerikanit në Shqipëri, takimet, paratë e paguara dhe shërbimet që i bëri Edi Ramës, një pjesë të padeklaruara, siç ia kërkon ligji.

Që Rama ka reflektuar për atë që ka ndodhur, e tregon edhe ndryshimi i shprehive të tij nga shtatori i vitit të kaluar dhe në janar të këtij viti.

Kështu, kur doli për herë të parë lajmi se një amerikan i FBI-së po hetohej për financim nga lobistë të huaj dhe aty përmendej emri i Edi Ramës, ky i fundit nuk pati ndonjë tutje. Përkundrazi, gjatë një bisede në rrjetet sociale e quajti amerikanin me një lloj mburrjeje “miku im”. Poshtë, përgjigjja e plotë:

“Nuk ka asnjë faj, cilët rus të mitë? Shefi i kundërterrorit i FBI-së ka qenë dhe është miku im. Nëse ai ka një çështje të tijën me drejtësinë në SHBA, është çështja e tij. Lëreni të flasë drejtësia në SHBA, nuk bëhet drejtësia kështu. Pres shumë më tepër se kaq, i pres të gjitha. Është e tmerrshme për këtë popull, për gjithë ato që ne i konsiderojmë vlera shqiptare, është e tmerrshme. Nuk kam ça të them më shumë se kaq, bëhet fjalë për një çështje që nuk ka asnjë lidhje me qeverinë shqiptarë. Nuk ka asnjë biznes të çfarëdollojshëm”, tha Rama në shtator të vitit 2022.

Por tani që gjërat u bënë serioze, tani që McGonigal u arrestua dhe për të dolën të dhëna të tjera komprometuese, tani Rama e ka ndryshuar të folurën. McGonigal nuk është më “miku im”, por “një zyrtar i FBI-së” me të cilin nuk ka asnjë lidhje.

“Akuzohet në Amerikë një zyrtar i FBI-së për gjëra që s’kanë as edhe një lidhje me mua (se po të kishin do t’i kishte nxjerrë hetimi i atyre që nuk manipulojnë prova e as kursejnë fajtorë) dhe në Shqipëri fillon gjyqi ndaj meje”, tha Rama të martën.

Nuk është e zakonshme për Edi Ramën që të mohojë miqësinë me ata që kanë pasur probleme me drejtësinë. Dhe miq të tillë, Rama ka pasur shumë.

Rama e mbrojti deri vonë mikun e tij Vangjush Dako, pas përgjimeve të dosjes 339. Rama e mbrojti Saimir Tahirin, pasi prokuroria i kërkoi heqjen e imunitetit, e kështu me radhë, ka mbrojtur Elvis Roshin, Arben Ndokën, Lefter Kokën, Ilir Beqen, etj., në problemet që këta kanë pasur me drejtësinë.

Diferenca është se në këtë rast përballë është drejtësia amerikane, jo ajo shqiptare. Nëse Charles McGonigal pranon të rrëfejë se përse i ka marrë paratë, Rama mund të ketë bërë një hap fals, për të cilin duhet të japë llogari./LAPSI

Read Previous

Kemi pagat më të ulëta, por çmimet e ushqimeve janë ndër më të lartat në rajon

Read Next

Autoriteti i Konkurrencës: Çmimet e karburanteve rriten si raketë, por ulen si pupël