PD: Drejtorët e bashkive të Ramës, administrata dhe policia po shkaktojnë probleme

Partia Demokratike denoncon se drejtorët e bashkive socialiste, administrata dhe policia po shkaktojnë probleme në qendrat e votimit.

Përfaqësuesi ligjor në PD, Ivi Kaso deklaroi se vëzhguesit tanë dhe raportuesit e tyre terreni kanë njoftuar për një seri problematikash në qendrat zgjedhore, shkaktuar nga drejtorë bashkish, funksionarë të administratës dhe implikime të policisë, me veprime apo mosveprime.

Policia e paarritshme     

“Sipas Pikës 7 të Urdhrit të KQ të Zgjedhjeve, kushdo qe konstaton shkelje ka të drejtë të njoftojë, krahas strukturave zgjedhore edhe Policinë e Shtetit. Njoftimi duhet bërë me shkrim ose te numri i Emergjencës 112. Policia është e detyruar të verifikojë informacionin dhe në rast të konstatimit të një shkeljeje duhet te veprojë. Dhe këtu qytetarët që kanë dashur të raportojnë shkelje, kanë hasur në vështirësinë e parë. Numri 112 i Policisë është jashtë funksionimit. Nuk e dimë nëse ky është defekt teknik, paaftësi apo është bërë në mënyrë të qëllimshme, por i bëjmë thirrje policisë të kthehet në krye të detyrës dhe të respektojë ligjin”, tha Kaso.

Grumbullimet pranë qendrave të votimit

Një tjetër proklitikë që përmendi është respekti i urdhrit të KQZ lidhur me grumbullimet pranë qendrave të votimit.

“Urdhri i KQZ gjithashtu përcakton qartë se persona të paautorizuar duhet të mbajnë një distancë nga objektet zgjedhore prej të paktën 150 m. Mosrespektim të kësaj distance, madje prani flagrante në qendrat e votimit të patronazhistëve, të drejtorëve të administartës dhe të personave të tjerë të paautorizuar janë raportuar sot gjatë gjithë paradites në bashki në të gjithë territorin”, tha Kaso.

Drejtorët e PS shfaqen në qendra votimesh

Më tej, renditi dhe të tjera problematike.

“Disa prej problematikave te hasura në procesin e votimit deri me tani vijojnë si më poshtë:

  • në mbi 500 qendra votimi nuk ka funksionuar pajisja e identifikimit elektronik, pavarësisht se operatoret jane paraqitur ne kohë.
  • në pjesën më të madhe, sipas raportimeve tona, ka grumbullime masive njerëzish të paautorizuar në oborret dhe mjediset hyrese të QV, patronazhistë dhe drejtues të administratës
  • policia e njoftuar për çlirimin e qendrave të votimit nga patronazhistët më së shumit nuk përgjigjet, por edhe kur përgjigjet refuzon te zbatoje Urdhërin, duke e nxjerrë tërësisht veten jashtë funksionit kryesor sot: mbarëvajtja e zgjedhjeve.
  • ka raportime të shumta që boja me të cilat shënohen gishtat fshihet lehtësisht duke ngritur dyshime për votim më shumë se një herë.
  • Raste arbitare të ndërhyrjes në procesin e votimit janë regjistruar sidomos në Durrës. Drejtori bashkiak Roni Shqopa, Davide Ndoj, kryetare e njësisë adminstrative Spitallë, Flamur Gjuzi drejtor i Sigurimeve Shëndetësore, dhe Artur Feto i OSHEE janë parë në qendrat e votimit në qytet dhe rrethina”, tha kaso.

Apeli

“I bëjmë thirrje policisë të kthehet në krye të detyrës, të njoftojë KZAZ për shkeljet dhe ne përfundim te hartojë proçesverbalin për shkeljen përkatëse. Të gjitha këto ndërhyrje hileqare në proces nga administrata dhe drejtorët e bashkive të Ramës nuk janë gjë tjetër vecse përpjekje për te tensionuar situatën dhe për tu munduar t’i bëjnë parapritë humbjes së së sigurt”, tha Kaso.

Një apel e bëri dhe për qytetarët.

“Koalicioni “BashkëFitojmë” ka vetëm një thirrje për qytetarët shqiptarë: dilni dhe shprehni vullnetin tuaj të lirë. Asgjë nuk e ndal valën e madhe të fitores dhe ndryshimit. Bashkë fitojmë”, përfundoi Kaso.

Read Previous

Analiza/ Rrjetet sociale shprehen në favor të Belind Këlliçit

Read Next

Celibashi, thirrje policisë: Largoni njerëzit e paautorizuar nga qendrat e votimit