Mbretëresha 95-vjeçare kalon natën në spital

Mbretëresha kaloi natën në spital për disa testime vetëm disa orë pasi anuloi një udhëtim zyrtar në Irlandën e Veriut për të shënuar 100 vjetorin e ndarjes së ishullit.
 
Mjekët mbretërorë urdhëruan Madhërinë e Saj, 95 vjeç, të pushonte dhe e këshilluan atë të anulonte udhëtimin në provincë, duke ndezur spekulime për arsyen e anulimit.
 
Mësohet se udhëtimi në spitalin privat King Edward VII në Londër të mërkurën pasdite u bë për disa ‘kontrolle paraprake’ dhe se qëndrimi në spital ishte për arsye praktike. Për këto arsye, si dhe për të mbrojtur privatësinë mjekësore të Mbretëreshës, vizita nuk u njoftua nga Buckingham Palace në atë kohë.
 
Pallati tha se monarkja u kthye dje në Kështjellën Windsor në kohën e drekës, ku pritet të shërohet për pjesën tjetër të javës. Ajo nuk mendohet të ketë kaluar një natë në spital që nga marsi 2013, kur u trajtua për një problem në stomak.
 
Pallati nuk ka komentuar nëse monarkja më jetëgjatë në botë ka marrë një injeksion përforcues Covid. Sipas Daily mail, duke pasur parasysh moshën e saj ka të ngjarë që ta marrë.
 
Është shumë e pazakontë që një angazhim i madh të anulohet në minutën e fundit, duke sugjeruar se stafi nuk po rrezikon me shëndetin e mbretëreshës.
 
Monarkja, burri i së cilës Duka i Edinburgut vdiq vetëm gjashtë muaj më parë në moshën 99-vjeçare, ka pasur një orar të ngjeshur që kur u kthye nga Balmoral në fillim të tetorit.
 
Javën e kaluar, ajo u detyrua të fillonte të përdorte një shkop ecjeje në publik për herë të parë. Dhe të martën në mbrëmje ajo priti një samit të madh Global Investment në Kështjellën Windsor, ku dukej e shndritshme dhe gazmore teksa kryente detyrat e saj mbretërore.
 
Ajo është përballur me 18 muaj të trazuar, duke përfshirë vdekjen e Dukës së Edinburgut si dhe largimin e ashpër të Princit Harry dhe gruas Meghan.

Read Previous

Biden thotë se SHBA do të mbrojë Tajvanin në rast sulmi nga Kina

Read Next

Rusi:Satirë me policinë rrugore, burgoset aktorja e komedisë.

Leave a Reply

Your email address will not be published.