Përfaqësuesi Special i SHBA-së në Afganistan, Thomas West të hënën, u shpreh se shpresonte që talebanët do të ishin “të suksesshëm” në betejën e tyre kundër Shtetit Islamik dhe la të kuptohet se sundimtarët e rinj të Afganistanit duhet të ndërpresin lidhjet e tyre me al-Kaedën nëse dëshirojnë njohje ndërkombëtare.
“Talebanët kanë shprehur shumë qartë dhe hapur dëshirën e tyre për të normalizuar marrëdhëniet me komunitetin ndërkombëtar, për të parë një rifillim të ndihmës, për të parë një kthim të komunitetit diplomatik ndërkombëtar në Kabul dhe për të parë lehtësimin e sanksioneve. Shtetet e Bashkuara nuk mund të ofrojnë asnjë nga këto gjëra vetë”, u tha West gazetarëve me telefon nga Brukseli, ku ai mbajti një konferencë mbi Afganistanin për aleancën e NATO-s, shkruan Breitbart.
“Aleatët do të vazhdojnë të luajnë një rol të rëndësishëm në Afganistan: Gjermania, Mbretëria e Bashkuar, Franca”, shtoi ai. “Ne të gjithë do të angazhohemi drejtpërdrejt dhe me sy të qartë me talebanët dhe me interesa dhe objektiva të përbashkëta.”
West tha se SHBA-të janë “të shqetësuara për rritjen e sulmeve të ISIS-K dhe ne duam që talebanët të jenë të suksesshëm kundër tyre”. ISIS-K është shkurtesa e përdorur gjerësisht për operacionet e Shtetit Islamik në Afganistan, të cilit organizata terroriste i referohet si “Khorasan”.
“Unë mendoj se ata kanë një përpjekje shumë të fuqishme kundër këtij grupi,” tha ai.
“Kur bëhet fjalë për grupet e tjera – shikoni, al-Kaeda vazhdon të ketë një prani atje për të cilën ne jemi shumë të shqetësuar”, shtoi ai.
West tha se Al-Kaeda është “një çështje e vazhdueshme shqetësimi për ne në dialogun tonë me talebanët”.
kumtari.al
