Gjiknuri: Rivali jonë në zgjedhjet e 14 majit është Berisha

Gjendja brenda Partisë Demokratike, ku Berisha ku humbur vulën ndërsa Basha nuk po i del për zot, ka rritur besimin e Partisë Socialiste për një rezultat më të thellë.

“Jo thjesht për gjyqin e vulës por 40-ta nuk diskutohet, e kam thënë në bazë të rezultateve historike. PS synon nga 45-55 bashki. Besoj që ky do të jetë rezultati“, thotë Damian Gjiknuri.

Edhe pse gjykata e rrëzoi Berishën dhe njohu si PD zyrtare grupin e Alibeajt e Bashës, Damian Gjiknuri thotë për ABC News, se në terren socialistët e prekin realitetin ndryshe nga sa vendosi drejtësia.

“Alibeaj me të tjerët kanë njerëzit e tyre mbështetës. Unë nuk dua t’i zhvlerësoj por pjesa më e madhe e opozitës është rreth Foltores dhe kjo gjë është e dukshme.“, shton Gjiknuri.

Sekretari i Përgjithshëm i PS-së nuk pranon që partia e tij të jetë përgjegjëse për gjendjen ku është sot Partia Demokratike.

“Është spekulim të thuhet se PS ka futur hundët në gjërat e PD. Ne nuk kemi bërë rregulla që dobësojnë opozitën sepse e ka shumë kollaj me një koalicion dhe mund të konkurrojë“,theksoi ai.

Vetë Partia Socialiste nuk do të bëjë koalicion me asnjë aleat në nivel kombëtar. Ajo do të shkojë e vetme në zgjedhjet e 14 majit, ndërsa aleanca të vogla lokale mund të bëhen me minoritarët.

Read Previous

Këlliçi tregon me pamje rrugët e lëna rrugëve nga Veliaj në Tiranë

Read Next

Presidenti Beggaj takim me Ilham Aliyev: Fryma e bashkëpunimit do të çojë përpara marrëdhëniet mes dy vendeve