Kumtari.al është konceptuar si një zë tjetër në lëmin e shumë të tillëve në treg. Ne nuk po futemi në këtë treg për ta ndryshuar atë, as për të rivalizuar kënd. Ne po futemi pasi gjykojmë se kemi diçka për të thënë, dhe duke qenë se jetojmë në shekullin e vrullit të informacionit përmes internetit, edhe ne do të themi e do t’i japim mundësinë kujdo që dëshiron të thotë një të vërtetë. Do të përpiqemi të mos bëjmë tituj për të arritur klikime dhe nuk do të bëjmë një titull të ndikuar nga të pavërtetat. Ne nuk i përkasim askujt dhe askënd nuk do të kursejmë në gjykim, dhe këtu bëhet fjalë vetëm për ato gjëra që kanë të bëjnë me parimet e interesit publik. Ndoshta, jo gjithmonë do jemi të parët në lajmin e fundit, por do të përpiqemi të jemi të parët në vërtetësi. Pse kumtari? Kumtari në gjuhën shqipe ka kuptimin e lajmëtarit, kumtuesit, prandaj menduam që përmbajtja e këtij “webi” të ketë lidhje organike me emrin e tij. Dëshirojmë shumë që lexuesi të jetë bashkëudhëtari ynë, qofshin lexues brenda apo jashtë Shqipërisë! Shpresojmë që të kemi përkrahjen dhe mirëkuptimin tuja në rrugëtimin tonë të përbashkët! Na priftë e mbara!